PSALMI IUXTA HEBR. 83

₁victori pro torculari filiorum Core canticum

₂quam dilecta tabernacula tua Domine exercituum

₃desiderat et defecit anima mea in atria Domini

cor meum et caro mea laudabunt Deum viventem

₄siquidem avis invenit domum

et passer nidum sibi ubi ponat pullos suos

altaria tua Domine exercituum rex meus et Deus meus

₅beati qui habitant in domo tua adhuc laudabunt te semper

₆beatus homo cuius fortitudo est in te semitae in corde eius

₇transeuntes in valle fletus fontem ponent eam

₈benedictione quoque amicietur doctor

ibunt de fortitudine in fortitudinem

parebunt apud Deum in Sion

₉Domine Deus exercituum exaudi orationem meam

ausculta Deus Iacob semper

₁₀clipeus noster vide Deus et adtende faciem christi tui

₁₁quoniam melior est dies in atriis tuis super milia

elegi abiectus esse in domo Dei mei

magis quam habitare in tabernaculis impietatis

₁₂quia sol et scutum Dominus Deus

gratiam et gloriam dabit Dominus

₁₃nec prohibebit bonum ab his qui ambulant in perfectione

Domine exercituum beatus homo qui confidet in te