PSALMI IUXTA HEBR. 82

₁canticum psalmi Asaph

₂Deus ne taceas ne sileas et non quiescas Deus

₃quia ecce inimici tui tumultuati sunt

et qui oderunt te levaverunt caput

₄contra populum tuum nequiter tractaverunt

et inierunt consilium adversum arcanum tuum

₅dixerunt venite et conteramus eos de gente

et non sit memoria nominis Israhel ultra

₆quoniam tractaverunt pariter contra te foedus pepigerunt

₇tabernacula Idumeae et Ismahelitarum

Moab et Aggareni

₈Gebal et Ammon et Amalech

Palestina cum habitatoribus Tyri

₉sed et Assur venit cum eis

facti sunt brachium filiorum Loth semper

₁₀fac illis sicut Madian et Sisarae

sicut Iabin in torrente Cison

₁₁contriti sunt in Aendor fuerunt quasi sterquilinium terrae

₁₂pone duces eorum sicut Oreb et Zeb

et Zebee et Salmana omnes principes eorum

₁₃qui dixerunt possideamus nobis pulchritudinem Dei

₁₄Deus meus pone eos ut rotam quasi stipulam ante faciem venti

₁₅quomodo ignis conburit silvam

et sicut flamma devorat montes

₁₆sic persequere eos in tempestate tua

et in turbine tuo conturba eos

₁₇imple facies eorum ignominia et quaerent nomen tuum Domine

₁₈confundantur et conturbentur usque in saeculum

et erubescant et pereant

₁₉et sciant quia nomen tuum est Dominus

solus tu Excelsus super omnem terram