PSALMI IUXTA HEBR. 80

₁victori in torcularibus Asaph

₂laudate Deum fortitudinem nostram

iubilate Deo Iacob

₃adsumite carmen et date tympanum citharam decoram cum psalterio

₄clangite in neomenia bucina

et in medio mense die sollemnitatis nostrae

₅quia legitimum Israhel est et iudicium Dei Iacob

₆testimonium in Ioseph posuit

cum egrederetur terra Aegypti

labium quod nesciebam audivi

₇amovi ab onere umerum eius manus eius a cofino recesserunt

₈in tribulatione invocasti et erui te

exaudivi te in abscondito tonitrui

probavi te super aquam Contradictionis semper

₉audi populus meus et contestor te Israhel si audieris me

₁₀non sit in te deus alienus et non adores deum peregrinum

₁₁ego sum Dominus Deus tuus qui eduxi te de terra Aegypti

dilata os tuum et implebo illud

₁₂et non audivit populus meus vocem meam

et Israhel non credidit mihi

₁₃et dimisi eum in pravitate cordis sui

ambulabunt in consiliis suis

₁₄utinam populus meus audisset me Israhel in viis meis ambulasset

₁₅quasi nihilum inimicos eius humiliassem

et super hostes eorum vertissem manum meam

₁₆qui oderunt Dominum negabunt eum

et erit tempus eorum in saeculo

₁₇et cibavit eos de adipe frumenti

et de petra mellis saturavit eos