PSALMI IUXTA HEBR. 79

₁victori pro liliis testimonii Asaph canticum

₂qui pascis Israhel ausculta

qui ducis quasi gregem Ioseph

qui sedes super cherubin ostendere

₃ante Efraim et Beniamin et Manasse

suscita fortitudinem tuam et veni ut salvos facias nos

₄Deus converte nos et ostende faciem tuam et salvi erimus

₅Domine Deus exercituum

usquequo fumabis ad orationem populi tui

₆cibasti nos pane flebili et potasti nos in lacrimis tripliciter

₇posuisti nos contentionem vicinis nostris

et inimici nostri subsannaverunt nos

₈Deus exercituum converte nos

et ostende faciem tuam et salvi erimus

₉vineam de Aegypto tulisti eiecisti gentes et plantasti eam

₁₀praeparasti ante faciem eius

et stabilisti radices eius et implevit

terram

₁₁operti sunt montes umbra eius et ramis illius cedri Dei

₁₂expandit comas suas usque ad mare

et usque ad Flumen germina sua

₁₃quare dissipasti maceriam eius

et vindemiaverunt eam omnes qui transeunt per viam

₁₄vastavit eam aper de silva

et omnes bestiae agri depastae sunt eam

₁₅Deus exercituum revertere obsecro

respice de caelo et vide et visita vineam hanc

₁₆et radicem quam plantavit dextera tua

et filium quem confirmasti tibi

₁₇succensam igni et deramatam ab increpatione faciei tuae pereant

₁₈fiat manus tua super virum dexterae tuae

et super filium hominis quem confirmasti tibi

₁₉et non recedemus a te vivificabis nos

et nomine tuo vocabimur

₂₀Domine Deus exercituum converte nos

et ostende faciem tuam et salvi erimus