PSALMI IUXTA HEBR. 74

₁victori ut non disperdas psalmus Asaph cantici

₂confitebimur tibi Deus confitebimur

et iuxta nomen tuum narrabunt mirabilia tua

₃cum accepero tempus ego iustitias iudicabo

₄dissolvetur terra cum omnibus habitatoribus suis

ego adpendi columnas eius semper

₅dixi inique agentibus nolite inique agere

et impiis nolite exaltare cornu

₆nolite exaltare in excelsum cornu

vestrum

loquentes in cervice veteri

₇quia nec ab oriente neque ab occidente

neque a solitudine montium

₈sed Deus iudex

hunc humiliabit et hunc exaltabit

₉quia calix in manu Domini est

et vino meraco usque ad plenum mixtus

et propinabit ex eo

verumtamen feces eius epotabunt bibentes

omnes impii terrae

₁₀ego autem adnuntiabo in sempiternum cantabo Deo Iacob

₁₁et omnia cornua impiorum confringam

exaltabuntur cornua iusti