PSALMI IUXTA HEBR. 75

₁victori in psalmis canticum Asaph carminis

₂cognoscetur in Iudaea Deus

in Israhel magnum nomen eius

₃et erit in Salem tabernaculum eius et habitatio eius in Sion

₄ibi confringet volatilia arcus

scutum et gladium et bellum semper

₅lumen tu es Magnifice a montibus captivitatis

₆spoliati sunt superbi corde

dormitaverunt somnum suum

et non invenerunt omnes viri exercitus manus suas

₇ab increpatione tua Deus Iacob consopitus est et currus et equus

₈tu terribilis es et quis stabit adversum te

ex tunc ira tua

₉de caelo adnuntiabis iudicium terra timens tacebit

₁₀cum surrexerit ad iudicandum Deus

ut salvos faciat omnes mites terrae semper

₁₁quia ira hominis confitebitur tibi

reliquiis irae accingeris

₁₂vovete et reddite Domino Deo vestro

omnes qui in circuitu eius sunt offerent dona terribili

₁₃auferenti spiritum ducum terribili regibus terrae