PSALMI IUXTA HEBR. 68

₁victori pro liliis David

₂salva me Deus

quoniam venerunt aquae usque ad animam

₃infixus sum in limo profundi

et non possum consistere

veni in profundum aquarum et flumen operuit me

₄laboravi clamans exasperatum est guttur meum

defecerunt oculi mei expectantes Deum meum

₅multiplicati sunt super capillos capitis mei qui oderunt me gratis

confortati sunt qui persequebantur me inimici mei iniuste

quae non rapueram tunc reddebam

₆Deus tu scis stultitiam meam

et peccata mea a te non sunt abscondita

₇non confundantur in me

qui expectant te Domine Deus exercituum

non confundantur in me qui quaerunt te Deus Israhel

₈quia propter te portavi obprobrium

operuit confusio faciem meam

₉alienus factus sum fratribus meis et peregrinus filiis matris meae

₁₀quia zelus domus tuae comedit me

et obprobrium exprobrantium tibi cecidit super me

₁₁et flevi in ieiunio animam meam

et factum est in obprobria mihi

₁₂et posui vestimentum meum saccum

et factus sum eis in parabulam

₁₃contra me loquebantur qui sedebant in porta

et cantabant bibentes vinum

₁₄mea autem oratio ad te Domine tempus reconciliationis est

Deus in multitudine misericordiae tuae

exaudi me in veritate salutaris tui

₁₅erue me de luto ut non infigar

libera me ab his qui oderunt me et de profundis aquis

₁₆ne operiat me fluvius aquae

et ne absorbeat me profundum

et non coronet super me puteus os suum

₁₇exaudi me Domine quoniam bona est misericordia tua

secundum multitudinem miserationum tuarum respice ad me

₁₈et ne abscondas faciem tuam a servo tuo

quoniam tribulor cito exaudi me

₁₉accede ad animam meam redime eam

propter inimicos meos libera me

₂₀tu scis obprobrium meum

et confusionem meam et ignominiam meam

₂₁coram te sunt omnes hostes mei

obprobrio contritum est cor meum et desperatus sum

et expectavi qui contristaretur et non fuit

et qui consolaretur et non inveni

₂₂et dederunt in esca mea fel et in siti mea potaverunt me aceto

₂₃sit mensa eorum coram eis in laqueum

et in retributiones ad corruendum

₂₄contenebrentur oculi eorum ne videant

et dorsum eorum semper incurva

₂₅effunde super eos indignationem tuam

et ira furoris tui conprehendat eos

₂₆fiat commoratio eorum deserta

in tabernaculis eorum non sit qui habitet

₂₇quoniam quem tu percussisti persecuti sunt

et ut adfligerent vulneratos tuos narrabant

₂₈da iniquitatem super iniquitatem eorum

et non veniant in iustitia tua

₂₉deleantur de libro viventium et cum iustis non scribantur

₃₀ego autem pauper et dolens

salus tua Deus suscipiet me

₃₁laudabo nomen Dei in cantico et magnificabo eum in confessione

₃₂et placebit Domino super vitulum novellum

cornua efferentem et ungulas

₃₃videntes mansueti laetabuntur

qui quaeritis Deum vivet anima vestra

₃₄quoniam exaudivit pauperes Dominus et vinctos suos non dispexit

₃₅laudent eum caeli et terra

maria et omne quod movetur in eis

₃₆quia Deus salvabit Sion et aedificabit civitates Iuda

et habitabunt ibi et possidebunt eam

₃₇et semen servorum eius possidebit eam

et qui diligunt nomen eius habitabunt in ea