PSALMI IUXTA HEBR. 61

₁victori per Idithun canticum David

₂attamen apud Deum silebit anima mea ex eo salus mea

₃attamen ipse est scutum meum et salus

mea

fortitudo mea non commovebor amplius

₄usquequo insidiamini contra virum interficitis omnes

quasi murus inclinus et maceria corruens

₅partem enim eius cogitaverunt expellere

placuerunt sibi in mendacio

ore suo singuli benedicunt et corde suo maledicunt semper

₆verumtamen Deo retice anima mea ab ipso enim praestolatio mea

₇ipse est fortitudo mea et salus mea susceptor meus non timebo

₈in Deo salutare meum et gloria mea

robur fortitudinis meae salus mea in Deo

₉sperate in eo omni tempore populi

effundite coram eo cor vestrum Deus spes nostra est semper

₁₀verumtamen vanitas filii Adam

mendacium filii viri in stateris dolosis

fraudulenter agunt simul

₁₁nolite confidere in calumnia et in rapina ne frustremini

divitiae si fluxerint ne adponatis cor

₁₂unum locutus est Deus duo haec audivi

quia imperium Dei est

₁₃et tibi Domine misericordia

quia tu reddes unicuique secundum opus suum