PSALMI IUXTA HEBR. 60

₁victori in psalmis David

₂exaudi Deus laudationem meam intende orationi meae

₃de novissimo terrae ad te clamabo cum triste fuerit cor meum

cum fortis elevabitur adversum me tu eris ductor meus

₄fuisti spes mea turris munitissima a facie inimici

₅habitabo in tabernaculo tuo iugiter

sperabo in protectione alarum tuarum semper

₆tu enim Deus exaudisti orationem meam

dedisti hereditatem timentibus nomen tuum

₇dies super dies regis adicies annos eius

donec est generatio et generatio

₈sedebit semper ante faciem Dei

misericordia et veritas servabunt eum

₉sic canam nomini tuo iugiter reddens vota mea per singulos dies