PSALMI IUXTA HEBR. 62

₁canticum David cum esset in deserto Iuda

₂Deus fortitudo mea tu es de luce consurgam ad te

sitivit te anima mea desideravit te caro mea

₃in terra invia et conficiente ac sine aqua

sic in sancto apparui tibi

ut videam fortitudinem tuam et gloriam tuam

₄melior est enim misericordia tua quam vitae

labia mea laudabunt te

₅sic benedicam tibi in vita mea

in nomine tuo levabo manus meas

₆quasi adipe et pinguidine implebitur anima mea

et labiis laudantibus canet os meum

₇recordans tui in cubili meo per singulas vigilias meditabor tibi

₈quia fuisti auxilium meum

in umbra alarum tuarum laudabo

₉adhesit anima mea post te

me suscepit dextera tua

₁₀ipsi vero interficere quaerunt animam meam

ingrediantur in extrema terrae

₁₁congregentur in manus gladii pars vulpium erunt

₁₂rex autem laetabitur in Deo

laudabitur omnis qui iurat in eo

quia obstruetur os loquentium mendacium