PSALMI IUXTA HEBR. 59

₁victori pro liliis testimonium humilis et perfecti David ad docendum

₂quando pugnavit adversum Syriam Mesopotamiae et adversum Syriam Suba

et reversus est Ioab et percussit Edom in valle Salinarum duodecim milia

₃Deus proiecisti nos et scidisti iratus convertisti nos

₄commovisti terram et disrupisti eam

sana contritiones eius quoniam commota est

₅ostendisti populo tuo duritiam potasti nos vino consopiente

₆dedisti timentibus te signum

ut fugerent a facie arcus semper

ut liberentur amici tui

₇salva dextera tua et exaudi me

₈Deus locutus est in sanctuario suo laetabor

dividam Sicimam et vallem Soccoth dimetiar

₉meus est Galaad et meus Manasse

et Efraim fortitudo capitis mei Iudas legifer meus

₁₀Moab olla lavacri mei

super Idumeam incedam calciamento meo

mihi Palestina foederata est

₁₁quis deducet me ad civitatem munitam

quis deducet me usque ad Idumeam

₁₂nonne tu Deus qui proiecisti nos

et non egredieris Deus in exercitibus nostris

₁₃da nobis auxilium in tribulatione

vana est enim salus ab homine

₁₄in Deo faciemus virtutem et ipse conculcabit tribulantes nos