PSALMI IUXTA HEBR. 55

₁victori pro columba muta

eo quod procul abierit David humilis et simplex

quando tenuerunt eum Palestini in Geth

₂miserere mei Deus quoniam conculcavit me homo

tota die pugnans tribulavit me

₃conculcaverunt me insidiatores mei tota die

multi enim qui pugnant contra me Altissime

₄quacumque die territus fuero ego in te confidam

₅in Deo laudavi verbum in Deo speravi

non timebo quid faciat caro mihi

₆tota die sermonibus me adfligebant

contra me omnes cogitationes eorum in malum

₇congregabuntur abscondite plantas meas observabunt

expectantes animam meam

₈quia nullus est salvus in eis

in furore populos detrahet Deus

₉secretiora mea numerasti

pone lacrimam meam in conspectu tuo sed non in narratione tua

₁₀tunc convertentur inimici mei retrorsum

in quacumque die invocavero hoc scio quia Deus meus es

₁₁in Deo laudabo verbum in Domino praedicabo sermonem

in Deo speravi non timebo quid faciat homo mihi

₁₂in me sunt Deus vota tua reddam gratiarum actiones tibi

₁₃quia liberasti animam meam de morte et pedes meos de lapsu

ut ambulem coram Deo in luce viventium