PSALMI IUXTA HEBR. 56

₁pro victoria ut non disperdas David humilem et simplicem

quando fugit a facie Saul in spelunca

₂miserere mei Deus miserere mei

quoniam in te sperat anima mea

in umbra alarum tuarum sperabo donec transeant insidiae

₃invocabo Deum altissimum Deum ultorem meum

₄mittet de caelo et salvabit me

exprobrabit conculcantibus me

semper

mittet Deus misericordiam suam et veritatem suam

₅anima mea in medio leonum dormivit ferocientium

filii hominum dentes eorum lancea et sagittae

et lingua eorum gladius acutus

₆exaltare super caelos Deus in omni terra gloria tua

₇rete paraverunt gressibus meis ad incurvandam animam meam

foderunt ante me foveam ceciderunt in medium eius semper

₈paratum cor meum Deus paratum cor meum cantabo et psallam

₉surge gloria mea surge psalterium et cithara surgam mane

₁₀confitebor tibi in populis Domine cantabo tibi in gentibus

₁₁quia magna usque ad caelos misericordia tua

et usque ad nubes veritas tua

₁₂exaltare super caelos Deus in omni terra gloria tua