PSALMI IUXTA HEBR. 5

₁victori pro hereditatibus canticum David

₂verba mea audi Domine intellege murmur meum

₃rex meus et Deus meus

₄quia te deprecor

Domine mane audies vocem meam

₅mane praeparabor ad te et contemplabor

quoniam non es deus volens iniquitatem tu

₆nec habitabit iuxta te malignus

non stabunt iniqui in conspectu oculorum tuorum

₇odisti omnes operantes iniquitatem

perdes loquentes mendacium

virum sanguinum et dolosum abominabitur Dominus

₈ego autem in multitudine misericordiae tuae

introibo in domum tuam

adorabo in templo sancto tuo in timore tuo

₉Domine deduc me in iustitia tua

propter insidiatores meos

dirige ante faciem meam viam tuam

₁₀non est enim in ore eorum rectum interiora eorum insidiae

₁₁sepulchrum patens guttur eorum linguam suam levificant

condemna eos Deus decidant a consiliis suis

iuxta multitudinem scelerum eorum

expelle eos quoniam provocaverunt te

₁₂et laetentur omnes qui sperant in te

in perpetuum laudabunt et proteges eos

et laetabuntur in te qui diligunt nomen tuum

₁₃quia tu benedices iusto

Domine ut scuto placabilitatis coronabis eum