PSALMI IUXTA HEBR. 42

₁iudica me Deus et discerne causam meam a gente non sancta

a viro doloso et iniquo salva me

₂tu enim Deus fortitudo mea quare proiecisti me

quare tristis incedo adfligente inimico

₃mitte lucem tuam et veritatem tuam

ipsae ducent me et introducent ad montem sanctum tuum

et ad tabernaculum tuum

₄et introibo ad altare tuum

ad Deum laetitiae et exultationis meae

et confitebor tibi in cithara Deus Deus meus

₅quare incurvaris anima mea et quare conturbas me

expecta Dominum quoniam adhuc confitebor ei

salutibus vultus mei et Deo meo