PSALMI IUXTA HEBR. 43

₁pro victoria filiorum Core eruditionis

₂Deus auribus nostris audivimus patres nostri narraverunt nobis

opus quod operatus es in diebus eorum in diebus antiquis

₃tu manu tua gentes delisti et plantasti eos

adflixisti populos et emisisti eos

₄non enim in gladio suo possederunt terram

neque brachium eorum salvavit eos

sed dextera tua et brachium tuum et lux vultus tui

quia conplacuisti tibi

₅tu es rex meus Deus praecipe pro salutibus Iacob

₆in te hostes nostros ventilabimus

in nomine tuo conculcabimus adversarios nostros

₇non enim in arcu meo confidam neque gladius meus salvabit me

₈quia salvasti nos de hostibus nostris

et eos qui oderant nos confudisti

₉in Domino gaudebimus tota die

et in nomine tuo in aeternum confitebimur semper

₁₀verum tu proiecisti et confudisti nos

et non egredieris in exercitibus nostris

₁₁vertisti terga nostra hosti

et qui oderant nos diripuerunt nos

₁₂dedisti nos quasi gregem ad vorandum

et in gentibus dispersisti nos

₁₃vendidisti populum tuum sine pretio

nec grandis fuit commutatio eorum

₁₄posuisti nos obprobrium vicinis nostris

subsannationem et inrisum his qui erant in circuitu nostro

₁₅posuisti nos similitudinem in gentibus

commotionem capitis in tribubus

₁₆tota die confusio mea contra me

et ignominia faciei meae cooperuit me

₁₇a voce exprobrantis et blasphemantis a facie inimici et ultoris

₁₈omnia haec venerunt super nos et non sumus obliti tui

nec mentiti fuimus in pacto tuo

₁₉non est conversum retro cor nostrum

nec declinaverunt gressus nostri a semita tua

₂₀quoniam deiecisti nos in loco draconum

et operuisti nos umbra mortis

₂₁si obliti sumus nominis Dei nostri

et expandimus manus nostras ad deum alienum

₂₂numquid non Deus investigabit istud

ipse enim novit cogitationes cordis

quoniam propter te mortificati sumus tota die

reputati sumus ut grex occisionis

₂₃consurge quare dormitas Domine

evigila quare proicis nos in sempiternum

₂₄quare faciem tuam abscondis

oblivisceris adflictiones et angustias nostras

₂₅quoniam incurvata est in pulvere anima nostra

adhesit terrae venter noster

₂₆surge auxiliare nobis

et redime nos propter misericordiam tuam