PSALMI IUXTA HEBR. 41

₁pro victoria doctissimi filiorum Core

₂sicut areola praeparata ad inrigationes aquarum

sic anima mea praeparata est ad te Deus

₃sitivit anima mea Deum fortem viventem

quando veniam et parebo ante faciem tuam

₄fuerunt mihi lacrimae meae panis per diem ac noctem

cum diceretur mihi tota die ubi est Deus tuus

₅horum recordatus sum et effudi in me animam meam

quia veniam ad umbraculum tacebo usque ad domum Dei

in voce laudis et confessionis multitudinis festa celebrantis

₆quare incurvaris anima mea et conturbas me

expecta Dominum quia adhuc confitebor ei

salutaribus vultus eius

₇Deus meus in memet ipso anima mea incurvatur

propterea recordabor tui

de terra Iordanis et Hermoniim de monte minimo

₈abyssus abyssum vocat in voce cataractarum tuarum

omnes gurgites tui et fluctus tui super me transierunt

₉per diem mandavit Dominus misericordiam suam

et in nocte canticum eius

mecum oratio Deo vitae meae

₁₀dicam Deo petra mea quare oblitus es mei

quare tristis incedo adfligente inimico

₁₁cum me interficerent in ossibus meis exprobraverunt mihi hostes mei

dicentes tota die ubi est Deus tuus

₁₂quare incurvaris anima mea et conturbas me

expecta Dominum quoniam adhuc confitebor ei

salutibus vultus mei et Deo meo