PSALMI IUXTA HEBR. 40

₁pro victoria canticum David

₂beatus qui cogitat de paupere in die mala salvabit eum Dominus

₃Dominus custodiet eum et vivificabit eum et beatus erit in terra

et non tradet eum animae inimicorum suorum

₄Dominus confortabit eum in lecto infirmitatis

totum stratum eius vertisti in aegrotatione sua

₅ego dixi Domine miserere mei

sana animam meam quoniam peccavi tibi

₆inimici mei loquentur malum mihi

quando morietur et periet nomen eius

₇et si venerit ut visitet vana loquetur cor eius

congregabit iniquitatem sibi et egrediens foras detrahet

₈simul adversum me murmurabant omnes odientes me

contra cogitabant malum mihi

₉verbum diabuli infundebant sibi

qui dormivit non addet ut resurgat

₁₀sed et homo pacificus meus in quo habui fiduciam

qui manducabat panem meum levavit contra me plantam

₁₁tu autem Domine miserere mei

et leva me ut reddam eis

₁₂in hoc cognovi quod velis me

quia non insultavit inimicus meus mihi

₁₃ego autem in simplicitate mea adiutus sum a te

et statues me ante faciem tuam in perpetuum

₁₄benedictus Dominus Deus Israhel

a saeculo et usque in saeculum amen amen