PSALMI IUXTA HEBR. 35

₁pro victoria servi Domini David

₂dixit scelus impii in medio cordis eius

non esse timorem Dei ante oculos eius

₃quia dolose egit adversum eum in oculis suis

ut inveniret iniquitatem eius ad odiendum

₄verba oris eius iniquitas et dolus

cessavit cogitare benefacere

₅iniquitatem cogitat in cubili suo stabit in via non bona

malum non abiciet

₆Domine in caelo misericordia tua fides tua usque ad nubes

₇iustitia tua quasi montes Domine iudicium tuum abyssus multa

homines et iumenta salvos facies Domine

₈quam pretiosa est misericordia tua Domine

et filii Adam in umbra alarum tuarum sperabunt

₉inebriabuntur de pinguidine domus tuae

et torrente deliciarum tuarum potabis eos

₁₀quoniam tecum est fons vitae in lumine tuo videbimus lumen

₁₁adtrahe misericordiam tuam scientibus te

et iustitiam tuam rectis corde

₁₂ne veniat mihi pes superbiae

et manus impiorum non me commoveat

₁₃ibi ceciderunt operantes iniquitatem

expulsi sunt et non potuerunt surgere