PSALMI IUXTA HEBR. 36

₁David

aleph noli contendere cum malignis

neque aemuleris facientes iniquitatem

₂quoniam sicut herba velociter conterentur

et sicut holus viride arescent

₃beth spera in Domino et fac bonum

peregrinare in terra et pascere fide

₄et delectare in Domino et dabit tibi petitiones cordis tui

₅gimel volve super Dominum viam tuam

et confide in eo et ipse faciet

₆et educet sicut lumen iustitiam tuam

et iudicium tuum sicut meridiem

₇deleth tace Domino et expecta eum

noli contendere adversum eum qui proficit in via sua

adversum virum qui facit quae cogitat

₈he dimitte iram et relinque furorem

noli contendere ut malefacias

₉quoniam qui malefaciunt interibunt

expectantes autem Dominum ipsi hereditabunt terram

₁₀vav adhuc enim modicum et non erit impius

et cogitabis de loco eius et non subsistet

₁₁mites autem hereditabunt terram

et delectabuntur in multitudine pacis

₁₂zai cogitat impius de iusto

et frendet adversum eum dentibus suis

₁₃Dominus deridebit eum

videns quod venit dies eius

₁₄heth gladium evaginaverunt impii

tetenderunt arcum suum ut percutiant egenum et pauperem

et interficiant rectos in via

₁₅gladius eorum ingrediatur in cor eorum

et arcus eorum confringantur

₁₆teth melius est parum iusto

quam divitiae impiorum multae

₁₇quia brachia impiorum confringentur

sublevat autem iustos Dominus

₁₈ioth novit Dominus diem inmaculatorum

et hereditas eorum aeterna erit

₁₉non confundentur in tempore malo et in diebus famis saturabuntur

₂₀caph quia impii peribunt

et inimici Domini gloriantes ut monocerotes

consumentur sicut fumus consumitur

₂₁lameth fenus accipit impius et non reddit

iustus autem donat et tribuit

₂₂quia qui benedicti fuerint ab eo hereditabunt terram

et qui maledicti interibunt

₂₃mem a Domino gressus viri firmantur

et viam eius volet

₂₄cum ceciderit non adlidetur quia Dominus sustentat manum eius

₂₅nun puer fui siquidem senui

et non vidi iustum derelictum neque semen eius quaerens panem

₂₆tota die donat et commodat et semen eius in benedictione

₂₇samech recede a malo et fac bonum

et habita in sempiterno

₂₈quia Dominus diligit iudicium et non derelinquet sanctos suos

ain in aeternum custoditi sunt

et semen impiorum periit

₂₉iusti hereditabunt terram

et habitabunt in saeculum super eam

₃₀fe os iusti meditabitur sapientiam

et lingua eius loquetur iudicium

₃₁lex Dei eius in corde eius non deficient gressus eius

₃₂sade considerat impius iustum et quaerit ut occidat eum

₃₃Dominus non derelinquet eum in manu eius

et non condemnabit eum cum iudicatur

₃₄coph expecta Dominum et custodi viam eius

et exaltabit te ut possideas terram

cum interibunt impii videbis

₃₅res vidi impium robustum

et fortissimum sicut indigenam virentem

₃₆et transivi et ecce non erat et quaesivi eum et non est inventus

₃₇sen custodi simplicitatem et vide rectum

quia erit ad extremum viro pax

₃₈iniqui autem delebuntur pariter et novissimum impiorum peribit

₃₉thau salus iustorum a Domino

fortitudo eorum in tempore tribulationis

₄₀et auxiliabitur eis Dominus

et salvabit eos ab impiis quia speraverunt in eo