PSALMI IUXTA HEBR. 34

₁David

iudica Domine adversarios meos

pugna contra pugnantes me

₂adprehende scutum et hastam

et consurge in auxilium meum

₃evagina gladium

et praeoccupa ex adverso persequentem me

dic animae meae salus tua ego sum

₄confundantur et revereantur qui quaerunt animam meam

convertantur retrorsum et confundantur qui cogitant malum mihi

₅fiant sicut pulvis ante faciem venti et angelus Domini inpellat

₆sit via eorum tenebrae et lubricum

et angelus Domini persequatur eos

₇quia frustra absconderunt mihi insidias retis sui

sine causa foderunt animae meae

₈veniat ei calamitas quam ignorat

et rete suum quod abscondit conprehendat eum et cadat in laqueum

₉anima autem mea exultabit in Domino

et laetabitur in salute sua

₁₀omnia ossa mea dicent Domine quis similis tui

eruens inopem a validiore et pauperem et mendicum a violento

₁₁surgentes testes iniqui quae nesciebam interrogabant me

₁₂reddebant mihi mala pro bono sterilitatem animae meae

₁₃ego autem cum infirmarer ab eis induebar cilicio

humiliabam in ieiunio animam meam

et oratio mea ad sinum meum revertetur

₁₄quasi ad amicum quasi ad fratrem meum sic ambulabam

quasi lugens mater tristis incurvabar

₁₅et in infirmitate mea laetabantur et congregabantur

collecti sunt adversum me percutientes et nesciebam

₁₆scindentes et non tacentes

in simulatione verborum fictorum frendebant contra me dentibus suis

₁₇Domine quanta aspicies

converte animam meam a calamitatibus suis

a leonibus solitariam meam

₁₈confitebor tibi in ecclesia grandi in populo forti laudabo te

₁₉non laetentur super me inimici mei mendaces

odientes me frustra coniventes oculo

₂₀non enim pacem loquuntur

sed in rapina terrae verba fraudulenta concinnant

₂₁et dilataverunt super me os suum

dixerunt va va vidit oculus noster

₂₂vidisti Domine ne taceas Domine ne elongeris a me

₂₃consurge et evigila in iudicium meum

Deus meus et Domine in causam meam

₂₄iudica me secundum iustitiam meam Domine Deus meus

et ne insultent mihi

₂₅ne dicant in corde suo va va va animae nostrae

ne dicant absorbuimus eum

₂₆confundantur et revereantur pariter qui laetantur in adflictione mea

induantur confusione et verecundia

qui magnificantur super me

₂₇laudent et laetentur qui volunt iustitiam meam

et dicant semper magnificetur Dominus

qui vult pacem servi sui

₂₈et lingua mea meditabitur iustitiam tuam tota die laudem tuam