PSALMI IUXTA HEBR. 30

₁victori canticum David

₂in te Domine speravi non confundar in aeternum

in iustitia tua salva me

₃inclina ad me aurem tuam velociter libera me

esto mihi in lapidem fortissimum

et in domum munitam ut salves me

₄quia petra mea et munitio mea tu es

et propter nomen tuum dux meus eris et enutries me

₅educes me de rete quod absconderunt mihi

quia tu fortitudo mea es

₆in manu tua commendabo spiritum meum

redemisti me Domine Deus veritatis

₇odisti custodientes vanitates frustra

ego autem in Domino confisus sum

₈exultabo et laetabor in misericordia tua

quia vidisti adflictionem meam cognovisti tribulationes animae meae

₉et non conclusisti me in manibus inimici

posuisti in latitudine pedes meos

₁₀miserere mei Domine quoniam tribulor

caligavit in furore oculus meus anima mea et venter meus

₁₁quia consumptae sunt in maerore vitae meae et anni mei in gemitu

infirmata est in iniquitate fortitudo mea et ossa mea contabuerunt

₁₂apud omnes hostes meos factus sum obprobrium

et vicinis meis nimis et timor notis meis

qui videbant me in plateis fugiebant me

₁₃oblivioni traditus sum quasi mortuus a corde

factus sum quasi vas perditum

₁₄audivi enim obprobrium multorum congregationem in circuitu

cum inirent consilium adversum me

et ut auferrent animam meam cogitarent

₁₅ego autem in te speravi Domine dixi Deus meus es tu

₁₆in manu tua tempora mea

libera me de manu inimicorum meorum et persequentium me

₁₇ostende faciem tuam super servum tuum

salva me in misericordia tua

₁₈Domine ne confundar quia invocavi te

confundantur impii taceant in inferno

₁₉muta fiant labia mendacii

quae loquuntur contra iustum vetera in superbia et despectione

₂₀quam multa est bonitas tua quam abscondisti timentibus

te

operatus es sperantibus in te in conspectu filiorum hominum

₂₁abscondes eos in protectione vultus tui a duritia viri

abscondes eos in umbra a contradictione linguarum

₂₂benedictus Dominus

qui mirabilem fecit misericordiam suam mihi in civitate munita

₂₃ego autem dixi in stupore meo

proiectus sum de conspectu oculorum eius

ergone audisti vocem deprecationis meae cum clamarem ad te

₂₄diligite Dominum omnes sancti eius

fideles servat Dominus

et retribuet his qui satis operantur superbiam

₂₅confortamini et roboretur cor vestrum

omnes qui expectatis Dominum