PSALMI IUXTA HEBR. 31

₁David eruditi

beatus cui dimissa est iniquitas et absconditum est peccatum

₂beatus homo cui non inputabit Dominus iniquitatem

nec est in spiritu eius dolus

₃quia tacui adtrita sunt ossa mea in rugitu meo tota die

₄die enim et nocte gravatur super me manus tua

versatus sum in miseria mea cum exardesceret messis iugiter

₅peccatum meum notum facio tibi

et iniquitatem meam non abscondo

dixi confitebor scelus meum Domino

et tu dimisisti iniquitatem peccati mei semper

₆pro hoc orat omnis sanctus ad te tempus inveniens

ut cum inundaverint aquae multae ad illum non accedant

₇tu es protectio mea ab hoste custodies me

laus mea salvans circumdabis me semper

₈doceam te et monstrabo tibi viam per quam ambules

cogitabo de te oculo meo

₉nolite fieri sicut equus et mulus quibus non est

intellegentia

in camo et freno maxillas eorum constringe qui non accedunt ad te

₁₀multi dolores impii

confidentem autem in Domino misericordia circumdabit

₁₁laetamini in Domino et exultate iusti et laudate omnes recti corde