PSALMI IUXTA HEBR. 25

₁David

iudica me Deus quoniam ego in simplicitate mea ambulavi

et in Domino confidens non deficiam

₂proba me Domine et tempta me ure renes meos et cor meum

₃quia misericordia tua in conspectu oculorum meorum est

et ambulabo in veritate tua

₄non sedi cum viris vanitatis et cum superbis non ingrediar

₅odivi ecclesiam pessimorum et cum iniquis non sedebo

₆lavabo in innocentia manus meas

et circuibo altare tuum Domine

₇ut clara voce praedicem laudem et narrem omnia mirabilia tua

₈Domine dilexi habitaculum domus tuae

et locum tabernaculi gloriae tuae

₉ne auferas cum peccatoribus animam meam

cum viris sanguinum vitam meam

₁₀in quorum manibus scelus est

et dextera eorum repleta est muneribus

₁₁ego autem in simplicitate mea gradiar

redime me et miserere mei

₁₂pes meus stetit in recto

in ecclesiis benedicam Domino