PSALMI IUXTA HEBR. 22

₁canticum David

Dominus pascit me nihil mihi deerit

₂in pascuis herbarum adclinavit me

super aquas refectionis enutrivit me

₃animam meam refecit

duxit me per semitas iustitiae propter nomen

suum

₄sed et si ambulavero in valle mortis

non timebo malum quoniam tu mecum es

virga tua et baculus tuus ipsa consolabuntur me

₅pones coram me mensam ex adverso hostium meorum

inpinguasti oleo caput meum calix meus inebrians

₆sed et benignitas et misericordia subsequetur me

omnibus diebus vitae meae

et habitabo in domo Domini in longitudine dierum