PSALMI IUXTA HEBR. 23

₁David canticum

Domini est terra et plenitudo eius orbis et habitatores eius

₂quia ipse super maria fundavit eum

et super flumina stabilivit illum

₃quis ascendet in montem Domini

et quis stabit in loco sancto eius

₄innocens manibus et mundo corde

qui non exaltavit frustra animam suam et non iuravit dolose

₅accipiet benedictionem a Domino et iustitiam a Deo salutari suo

₆haec generatio quaerentium eum

quaerentium faciem tuam Iacob semper

₇levate portae capita vestra

et elevamini ianuae sempiternae

et ingrediatur rex gloriae

₈quis est iste rex gloriae

Dominus fortis et potens Dominus fortis in proelio

₉levate portae capita vestra et erigite ianuae sempiternae

et ingrediatur rex gloriae

₁₀quis est iste rex gloriae

Dominus exercituum ipse est rex gloriae semper