PSALMI IUXTA HEBR. 2

₁quare turbabuntur gentes et tribus meditabuntur inania

₂consurgent reges terrae et principes tractabunt pariter

adversum Dominum et adversum christum eius

₃disrumpamus vincula eorum

et proiciamus a nobis laqueos eorum

₄habitator caeli ridebit Dominus subsannabit eos

₅tunc loquetur ad eos in ira sua

et in furore suo conturbabit eos

₆ego autem orditus sum regem meum

super Sion montem sanctum suum

adnuntiabo Dei praeceptum

₇Dominus dixit ad me filius meus es tu ego hodie genui te

₈postula a me et dabo tibi gentes hereditatem tuam

et possessionem tuam terminos terrae

₉pasces eos in virga ferrea ut vas figuli conteres eos

₁₀nunc ergo reges intellegite erudimini iudices terrae

₁₁servite Domino in timore et exultate in tremore

₁₂adorate pure ne forte irascatur et pereatis de via

₁₃cum exarserit post paululum furor eius

beati omnes qui sperant in eum