PSALMI IUXTA HEBR. 3

₁canticum David cum fugeret a facie Abessalon filii

sui

₂Domine quare multiplicati sunt hostes mei

multi consurgunt adversus me

₃multi dicunt animae meae

non est salus huic in Deo semper

₄tu autem Domine clipeus circa me

gloria mea et exaltans caput meum

₅voce mea ad Dominum clamabo

et exaudiet me de monte sancto suo semper

₆ego dormivi et soporatus sum

evigilavi quia Dominus sustentavit me

₇non timebo milia populi quae circumdederunt me

surge Domine salvum me fac Deus meus

₈quia percussisti omnium inimicorum meorum maxillam

dentes impiorum confregisti

₉Domini est salus super populum tuum benedictio tua semper