PSALMI IUXTA HEBR. 148

₁alleluia

laudate Dominum de caelis laudate eum in excelsis

₂laudate eum omnes angeli eius

laudate eum omnes exercitus eius

₃laudate eum sol et luna laudate eum omnes stellae luminis

₄laudate eum caeli caelorum et aquae quae super caelos sunt

₅laudent nomen Domini

quoniam ipse mandavit et creata sunt

₆et statuit ea in saeculum et in saeculum

praeceptum dedit et non praeteribit

₇laudate Dominum de terra dracones et omnes abyssi

₈ignis et grando nix et glacies ventus turbo

quae facitis sermonem eius

₉montes et omnes colles lignum fructiferum et universae cedri

₁₀bestiae et omnia iumenta reptilia et aves volantes

₁₁reges terrae et omnes populi principes et universi iudices terrae

₁₂iuvenes et virgines senes cum pueris laudent nomen Domini

₁₃quoniam sublime nomen eius solius

₁₄gloria eius in caelo et in terra

et exaltavit cornu populi sui

laus omnibus sanctis eius

filiis Israhel populo adpropinquanti sibi alleluia