PSALMI IUXTA HEBR. 149

₁alleluia cantate Domino canticum novum

laus eius in congregatione sanctorum

₂laetetur Israhel in factore suo filii Sion exultent in rege suo

₃laudent nomen eius in choro

in tympano et cithara cantent ei

₄quia conplacet sibi Dominus in populo suo

exaltabit mansuetos in Iesu

₅exultabunt sancti in gloria laudabunt in cubilibus suis

₆exaltationes Dei in gutture eorum

et gladii ancipites in manibus eorum

₇ad faciendam vindictam in gentibus increpationes in populis

₈ut alligent reges eorum catenis

et inclitos eorum conpedibus ferreis

₉ut faciant in eis iudicium scriptum

decor est omnium sanctorum eius alleluia