PSALMI IUXTA HEBR. 146

₁alleluia

laudate Dominum quoniam bonum est canticum Dei nostri

quoniam decorum est pulchra laudatio

₂aedificabit Hierusalem Dominus

eiectos Israhel congregabit

₃qui sanat contritos corde et alligat plagas eorum

₄qui numerat multitudinem stellarum et omnes nomine suo vocat

₅magnus Dominus noster et multus fortitudine

prudentiae eius non est numerus

₆suscipiens mansuetos Dominus

humilians impios usque ad terram

₇canite Domino in confessione

canite Deo nostro in cithara

₈qui operit caelos nubibus et praebet terrae pluviam

et oriri facit in montibus germen

₉qui dat iumentis panem suum filiis corvi clamantibus

₁₀non est in fortitudine equi voluntas eius

neque in tibiis viri placetur ei

₁₁placetur Domino in his qui timent eum

et expectant misericordiam eius