PSALMI IUXTA HEBR. 145

₁alleluia

₂lauda anima mea Dominum laudabo Dominum in vita mea

cantabo Deo meo quamdiu sum

nolite confidere in principibus

₃in filio hominis cui non est salus

₄egredietur spiritus eius

et revertetur in humum suam

in die illa peribunt cogitationes eius

₅beatus cuius Deus Iacob auxiliator eius

spes eius in Domino Deo suo

₆qui fecit caelos et terram mare et omnia quae in eis sunt

₇et custodit veritatem in sempiternum

qui facit iudicium calumniam sustinentibus

et dat panem esurientibus

Dominus solvit vinctos

₈Dominus inluminat caecos

Dominus erigit adlisos Dominus diligit iustos

₉Dominus custodit advenas pupillum et viduam suscipiet

et viam impiorum conteret

₁₀regnabit Dominus in aeternum

Deus tuus Sion in generationem et generationem