PSALMI IUXTA HEBR. 144

₁hymnus David

aleph exaltabo te Deus meus rex

et benedicam nomini tuo in aeternum et ultra

₂beth in omni die benedicam tibi

et laudabo nomen tuum in sempiternum iugiter

₃gimel magnus Deus et laudabilis nimis

et magnificentiae eius non est inventio

₄deleth generatio ad generationem laudabit opera tua

et fortitudines tuas adnuntiabunt

₅he decorem gloriae magnitudinis tuae

et verba mirabilium tuorum loquar

₆vav et fortitudinem horribilium tuorum loquentur

et magnitudines tuas narrabo

₇zai memoriam multae bonitatis tuae loquentur

et iustitias tuas laudabunt

₈heth clemens et misericors Dominus

patiens et multae miserationis

₉teth bonus Dominus omnibus

et misericordiae eius in universa opera eius

₁₀ioth confiteantur tibi Domine omnia opera tua

et sancti tui benedicant tibi

₁₁caph gloriam regni tui dicent

et fortitudines tuas loquentur

₁₂lameth ut ostendant filiis hominum fortitudines eius

et gloriam decoris regni eius

₁₃mem regnum tuum regnum omnium saeculorum

et potestas tua in omni generatione et generatione

₁₄samech sustentat Dominus omnes corruentes

et erigit universos iacentes

₁₅ain oculi eorum in te sperant

et tu das eis escam suam in tempore suo

₁₆fe aperis manus tuas et imples omne animal refectione

₁₇sade iustus Dominus in omnibus viis suis

et sanctus in omnibus operibus suis

₁₈coph iuxta est Dominus omnibus qui invocant

eum

omnibus qui invocant eum in veritate

₁₉res placitum timentium se faciet

et clamorem eorum audiet et salvabit eos

₂₀sen custodit Dominus omnes diligentes se

et universos impios conteret

₂₁thau laudem Domini loquetur os meum

et benedicet omnis caro nomini sancto eius

in aeternum et iugiter