PSALMI IUXTA HEBR. 140

₁canticum David

Domine clamavi ad te festina mihi

exaudi vocem meam clamantis ad te

₂dirigatur oratio mea sicut incensum in conspectu tuo

elevatio manuum mearum sacrificium vespertinum

₃pone Domine custodem ori meo

serva paupertatem labiorum meorum

₄ne declines cor meum in verbum malum

volvere cogitationes impias cum viris operantibus iniquitatem

neque comedere in deliciis eorum

₅corripiat me iustus in misericordia et arguat me

oleum amaritudinis non inpinguet caput meum

quia adhuc et oratio mea pro malitiis eorum

₆sublati sunt iuxta petram iudices eorum

et audient verba mea quoniam decora sunt

₇sicut agricola cum scindit terram

sic dissipata sunt ossa nostra in ore inferi

₈quia ad te Domine Deus oculi mei

in te speravi ne evacues animam meam

₉custodi me de manibus laquei quod posuerunt mihi

et de offendiculis operantium iniquitatem

₁₀incident in rete eius impii simul ego autem transibo