PSALMI IUXTA HEBR. 139

₁pro victoria canticum David

₂erue me Domine ab homine malo

a viris iniquis serva me

₃qui cogitaverunt malitias in corde

tota die versati sunt in proeliis

₄exacuerunt linguam suam quasi serpens

venenum aspidis sub labiis eorum semper

₅custodi me Domine de manu impii a viro iniquitatum serva me

qui cogitaverunt subplantare gressus meos

₆absconderunt superbi laqueum mihi

et funibus extenderunt rete

iuxta semitam offendiculum posuerunt mihi semper

₇dixi Domino Deus meus tu

audi Domine vocem deprecationis meae

₈Domine Deus fortitudo salutis meae

protexisti caput meum in die belli

₉ne des Domine desideria impii

scelera eius ne effundantur et

eleventur semper

₁₀amaritudo convivarum meorum

labor labiorum eorum operiat eos

₁₁cadent super eos carbones ignis

deicies eos in foveas ut non consurgant

₁₂vir linguosus non dirigetur in terra

virum iniquum mala capient in interitu

₁₃scio quod faciet Dominus causam inopis iudicia pauperum

₁₄attamen iusti confitebuntur nomini tuo

habitabunt recti cum vultu tuo