PSALMI IUXTA HEBR. 141

₁eruditio David cum esset in spelunca oratio

₂voce mea ad Dominum clamavi

voce mea ad Dominum deprecatus sum

₃effundam in conspectu eius eloquium meum

tribulationem meam coram illo adnuntiabo

₄cum anxius in me fuerit spiritus meus

tu enim nosti semitam meam

in via hac qua ambulabo absconderunt laqueum mihi

₅respice ad dexteram et vide quia non sit qui cognoscat me

periit fuga a me

non est qui quaerat animam meam

₆clamavi ad te Domine dixi tu spes mea

pars mea in terra viventium

₇ausculta deprecationem meam quoniam infirmatus sum nimis

libera me a persecutoribus

quoniam confortati sunt super me

₈educ de carcere animam meam ut confiteatur nomini tuo

me expectant iusti cum retribueris mihi