PSALMI IUXTA HEBR. 137

₁David

confitebor tibi in toto corde meo

in conspectu deorum cantabo tibi

₂adorabo in templo sancto tuo et confitebor nomini tuo

super misericordia tua et super veritate tua

quia magnificasti super omne nomen tuum

eloquium tuum

₃in die invocabo et exaudies me dilatabis animae meae fortitudinem

₄confiteantur tibi Domine omnes reges terrae

quoniam audierunt eloquia oris tui

₅et cantent in viis Domini quoniam magna gloria Domini

₆quoniam excelsus Dominus et humilem respicit

et excelsa de longe cognoscit

₇si ambulavero in medio tribulationis vivificabis me

super furorem inimicorum meorum mittes manum tuam

et salvabit me dextera tua

₈Dominus operabitur pro me

Domine misericordia tua in aeternum

opera manuum tuarum ne dimittas