PSALMI IUXTA HEBR. 136

₁super flumina Babylonis ibi sedimus et flevimus

cum recordaremur Sion

₂super salices in medio eius suspendimus citharas nostras

₃quoniam ibi interrogaverunt nos qui captivos duxerunt nos

verba carminis

et qui adfligebant nos

laeti canite nobis de canticis Sion

₄quomodo cantabimus canticum Domini in terra aliena

₅si oblitus fuero tui Hierusalem in oblivione sit dextera mea

₆adhereat lingua mea gutturi meo si non recordatus fuero tui

si non praeposuero Hierusalem

in principio laetitiae meae

₇memento Domine filiorum Edom

in diem Hierusalem

dicentium evacuate evacuate usque ad fundamentum eius

₈filia Babylon vastata

beatus qui retribuet tibi vicissitudinem tuam quam retribuisti nobis

₉beatus qui tenebit et adlidet parvulos tuos ad petram