PSALMI IUXTA HEBR. 123

₁canticum graduum David

nisi Dominus fuisset in nobis dicat nunc Israhel

₂nisi Dominus fuisset in nobis

cum exsurgerent super nos homines

₃forsitan vivos absorbuissent nos

cum irasceretur furor eorum super nos

₄forsitan aquae circumdedissent nos

₅torrens transisset super animam nostram

forsitan transissent super animam nostram aquae superbae

₆benedictus Dominus qui non dedit nos in praedam dentibus eorum

₇anima nostra quasi avis erepta est de laqueo venantium

laqueus contritus est et nos liberati sumus

₈auxilium nostrum in nomine Domini qui fecit caelum et terram