PSALMI IUXTA HEBR. 11

₁victori pro octava canticum David

₂salva Domine quoniam defecit sanctus

quoniam inminuti sunt fideles a filiis hominum

₃frustra loquuntur unusquisque proximo suo

labium subdolum in corde et corde locuti sunt

₄disperdat Dominus omnia labia dolosa linguam magniloquam

₅qui dixerunt linguam nostram roboremus

labia nostra nobiscum sunt quis dominus noster est

₆propter vastitatem inopum et gemitum pauperum

nunc consurgam dicit Dominus

ponam in salutari auxilium eorum

₇eloquia Domini eloquia munda

argentum igne probatum separatum a terra colatum septuplum

₈tu Domine custodies ea

servabis nos a generatione hac in aeternum

₉in circuitu impii ambulabunt

cum exaltati fuerint vilissimi filiorum hominum