PSALMI IUXTA HEBR. 12

₁victori canticum David

usquequo Domine oblivisceris mei penitus

usquequo abscondes faciem tuam a me

₂usquequo ponam consilia in anima mea

dolorem in corde meo per diem

₃usquequo exaltabitur inimicus meus super me

₄convertere exaudi me Domine Deus meus

inlumina oculos meos ne umquam obdormiam in mortem

₅nequando dicat inimicus meus praevalui adversus eum

hostes mei exultabunt cum motus fuero

₆ego autem in misericordia tua confido

exultabit cor meum in salutari tuo

cantabo Domino quia reddidit mihi