LIBER PROVERBIORUM 3

₁fili mi ne obliviscaris legis meae

et praecepta mea custodiat cor tuum

₂longitudinem enim dierum et annos vitae

et pacem adponent tibi

₃misericordia et veritas non te deserant

circumda eas gutturi tuo et describe in tabulis cordis tui

₄et invenies gratiam et disciplinam bonam coram Deo et hominibus

₅habe fiduciam in Domino ex toto corde tuo

et ne innitaris prudentiae tuae

₆in omnibus viis tuis cogita illum et ipse diriget gressus tuos

₇ne sis sapiens apud temet ipsum

time Dominum et recede a malo

₈sanitas quippe erit umbilico tuo et inrigatio ossuum tuorum

₉honora Dominum de tua substantia

et de primitiis omnium frugum tuarum

₁₀et implebuntur horrea tua saturitate

et vino torcularia redundabunt

₁₁disciplinam Domini fili mi ne abicias

nec deficias cum ab eo corriperis

₁₂quem enim diligit Dominus corripit

et quasi pater in filio conplacet sibi

₁₃beatus homo qui invenit sapientiam

et qui affluit prudentia

₁₄melior est adquisitio eius negotiatione argenti

et auro primo fructus

eius

₁₅pretiosior est cunctis opibus

et omnia quae desiderantur huic non valent conparari

₁₆longitudo dierum in dextera eius

in sinistra illius divitiae et gloria

₁₇viae eius viae pulchrae et omnes semitae illius pacificae

₁₈lignum vitae est his qui adprehenderint eam

et qui tenuerit eam beatus

₁₉Dominus sapientia fundavit terram stabilivit caelos prudentia

₂₀sapientia illius eruperunt abyssi et nubes rore concrescunt

₂₁fili mi ne effluant haec ab oculis tuis

custodi legem atque consilium

₂₂et erit vita animae tuae et gratia faucibus tuis

₂₃tunc ambulabis fiducialiter in via tua et pes tuus non inpinget

₂₄si dormieris non timebis quiesces et suavis erit somnus tuus

₂₅ne paveas repentino terrore

et inruentes tibi potentias impiorum

₂₆Dominus enim erit in latere tuo

et custodiet pedem tuum ne capiaris

₂₇noli prohibere benefacere eum qui potest si vales et ipse benefac

₂₈ne dicas amico tuo vade et revertere

et cras dabo tibi cum statim possis dare

₂₉ne moliaris amico tuo malum cum ille in te habeat fiduciam

₃₀ne contendas adversus hominem frustra

cum ipse tibi nihil mali fecerit

₃₁ne aemuleris hominem iniustum nec imiteris vias eius

₃₂quia abominatio Domini est omnis inlusor

et cum simplicibus sermocinatio eius

₃₃egestas a Domino in domo impii

habitacula autem iustorum benedicentur

₃₄inlusores ipse deludet

et mansuetis dabit gratiam

₃₅gloriam sapientes possidebunt

stultorum exaltatio ignominia