LIBER PROVERBIORUM 2

₁fili mi si susceperis sermones meos

et mandata mea absconderis penes te

₂ut audiat sapientiam auris tua

inclina cor tuum ad noscendam

prudentiam

₃si enim sapientiam invocaveris et inclinaveris cor tuum prudentiae

₄si quaesieris eam quasi pecuniam

et sicut thesauros effoderis illam

₅tunc intelleges timorem Domini et scientiam Dei invenies

₆quia Dominus dat sapientiam

et ex ore eius scientia et prudentia

₇custodiet rectorum salutem et proteget gradientes simpliciter

₈servans semitas iustitiae et vias sanctorum custodiens

₉tunc intelleges iustitiam et iudicium

et aequitatem et omnem semitam bonam

₁₀si intraverit sapientia cor tuum et scientia animae tuae placuerit

₁₁consilium custodiet te prudentia servabit te

₁₂ut eruaris de via mala

ab homine qui perversa loquitur

₁₃qui relinquunt iter rectum et ambulant per vias tenebrosas

₁₄qui laetantur cum malefecerint et exultant in rebus pessimis

₁₅quorum viae perversae et infames gressus eorum

₁₆ut eruaris a muliere aliena

et ab extranea quae mollit sermones suos

₁₇et relinquit ducem pubertatis suae

₁₈et pacti Dei sui oblita est

inclinata est enim ad mortem domus eius

et ad impios semitae ipsius

₁₉omnes qui ingrediuntur ad eam non revertentur

nec adprehendent semitas vitae

₂₀ut ambules in via bona et calles iustorum custodias

₂₁qui enim recti sunt habitabunt in terra

et simplices permanebunt in ea

₂₂impii vero de terra perdentur

et qui inique agunt auferentur ex ea