LIBER PROVERBIORUM 20

₁luxuriosa res vinum et tumultuosa ebrietas

quicumque his delectatur non erit sapiens

₂sicut rugitus leonis ita terror regis

qui provocat eum peccat in animam suam

₃honor est homini qui separat se a contentionibus

omnes autem stulti miscentur contumeliis

₄propter frigus piger arare noluit

mendicabit ergo aestate et non dabitur ei

₅sicut aqua profunda sic consilium in corde viri

sed homo sapiens exhauriet illud

₆multi homines misericordes vocantur

virum autem fidelem quis inveniet

₇iustus qui ambulat in simplicitate sua

beatos post se filios derelinquet

₈rex qui sedet in solio iudicii

dissipat omne malum intuitu suo

₉quis potest dicere mundum est cor meum purus sum a peccato

₁₀pondus et pondus mensura et mensura

utrumque abominabile est apud Deum

₁₁ex studiis suis intellegitur puer

si munda et si recta sint opera eius

₁₂aurem audientem et oculum videntem Dominus fecit utrumque

₁₃noli diligere somnum ne te egestas opprimat

aperi oculos tuos et saturare panibus

₁₄malum est malum est dicit omnis emptor

et cum recesserit tunc gloriabitur

₁₅est aurum et multitudo gemmarum

vas autem pretiosum labia scientiae

₁₆tolle vestimentum eius qui fideiussor extitit alieni

et pro extraneis aufer pignus ab eo

₁₇suavis est homini panis mendacii

et postea implebitur os eius calculo

₁₈cogitationes consiliis roborantur

et gubernaculis tractanda sunt bella

₁₉ei qui revelat mysteria et ambulat fraudulenter et dilatat labia sua ne

commiscearis

₂₀qui maledicit patri suo et matri

extinguetur lucerna eius in mediis tenebris

₂₁hereditas ad quam festinatur in principio

in novissimo benedictione carebit

₂₂ne dicas reddam malum

expecta Dominum et liberabit te

₂₃abominatio est apud Deum pondus et pondus

statera dolosa non est bona

₂₄a Domino diriguntur gressus viri

quis autem hominum intellegere potest viam suam

₂₅ruina est hominis devorare sanctos

et post vota tractare

₂₆dissipat impios rex sapiens

et curvat super eos fornicem

₂₇lucerna Domini spiraculum hominis

quae investigat omnia secreta ventris

₂₈misericordia et veritas custodiunt regem

et roboratur clementia thronus eius

₂₉exultatio iuvenum fortitudo eorum et dignitas senum canities

₃₀livor vulneris absterget mala

et plagae in secretioribus ventris