LIBER PROVERBIORUM 16

₁hominis est animum praeparare

et Dei gubernare linguam

₂omnes viae hominum patent oculis eius

spirituum ponderator est Dominus

₃revela Domino opera tua et dirigentur cogitationes tuae

₄universa propter semet ipsum operatus est Dominus

impium quoque ad diem malum

₅abominatio Domini omnis arrogans

etiam si manus ad manum fuerit non erit

innocens

₆misericordia et veritate redimitur iniquitas

et in timore Domini declinatur a malo

₇cum placuerint Domino viae hominis

inimicos quoque eius convertet ad pacem

₈melius est parum cum iustitia quam multi fructus cum iniquitate

₉cor hominis disponet viam suam

sed Domini est dirigere gressus eius

₁₀divinatio in labiis regis in iudicio non errabit os eius

₁₁pondus et statera iudicia Domini sunt

et opera eius omnes lapides sacculi

₁₂abominabiles regi qui agunt impie

quoniam iustitia firmatur solium

₁₃voluntas regum labia iusta

qui recta loquitur diligetur

₁₄indignatio regis nuntii mortis

et vir sapiens placabit eam

₁₅in hilaritate vultus regis vita

et clementia eius quasi imber serotinus

₁₆posside sapientiam quia auro melior est

et adquire prudentiam quia pretiosior est argento

₁₇semita iustorum declinat mala

custos animae suae servat viam suam

₁₈contritionem praecedit superbia

et ante ruinam exaltatur spiritus

₁₉melius est humiliari cum mitibus

quam dividere spolia cum superbis

₂₀eruditus in verbo repperiet bona

et qui in Domino sperat beatus est

₂₁qui sapiens corde est appellabitur prudens

et qui dulcis eloquio maiora percipiet

₂₂fons vitae eruditio possidentis doctrina stultorum fatuitas

₂₃cor sapientis erudiet os eius

et labiis illius addet gratiam

₂₄favus mellis verba conposita

dulcedo animae et sanitas ossuum

₂₅est via quae videtur homini recta

et novissimum eius ducit ad mortem

₂₆anima laborantis laborat sibi quia conpulit eum os suum

₂₇vir impius fodit malum et in labiis eius ignis ardescit

₂₈homo perversus suscitat lites et verbosus separat principes

₂₉vir iniquus lactat amicum suum

et ducit eum per viam non bonam

₃₀qui adtonitis oculis cogitat prava

mordens labia sua perficit malum

₃₁corona dignitatis senectus in viis iustitiae repperietur

₃₂melior est patiens viro forte

et qui dominatur animo suo expugnatore urbium

₃₃sortes mittuntur in sinu

sed a Domino temperantur