LIBER PROVERBIORUM 15

₁responsio mollis frangit iram sermo durus suscitat furorem

₂lingua sapientium ornat scientiam os fatuorum ebullit stultitiam

₃in omni loco oculi Domini contemplantur malos et bonos

₄lingua placabilis lignum vitae

quae inmoderata est conteret spiritum

₅stultus inridet disciplinam patris sui

qui autem custodit increpationes astutior fiet

₆domus iusti plurima fortitudo

et in fructibus impii conturbatur

₇labia sapientium disseminabunt scientiam

cor stultorum dissimile erit

₈victimae impiorum abominabiles Domino

vota iustorum placabilia

₉abominatio est Domino via impii

qui sequitur iustitiam diligetur ab eo

₁₀doctrina mala deserenti viam

qui increpationes odit morietur

₁₁infernus et perditio coram Domino

quanto magis corda filiorum hominum

₁₂non amat pestilens eum qui se corripit nec ad sapientes graditur

₁₃cor gaudens exhilarat faciem in maerore animi deicitur spiritus

₁₄cor sapientis quaerit doctrinam

et os stultorum pascetur inperitia

₁₅omnes dies pauperis mali secura mens quasi iuge convivium

₁₆melius est parum cum timore Domini

quam thesauri magni et insatiabiles

₁₇melius est vocare ad holera cum caritate

quam ad vitulum saginatum cum odio

₁₈vir iracundus provocat rixas qui patiens est mitigat suscitatas

₁₉iter pigrorum quasi sepes spinarum

via iustorum absque offendiculo

₂₀filius sapiens laetificat patrem

et stultus homo despicit matrem suam

₂₁stultitia gaudium stulto et vir prudens dirigit gressus

₂₂dissipantur cogitationes ubi non est consilium

ubi vero plures sunt consiliarii confirmantur

₂₃laetatur homo in sententia oris sui

et sermo oportunus est optimus

₂₄semita vitae super eruditum ut declinet de inferno novissimo

₂₅domum superborum demolietur Dominus

et firmos facit terminos viduae

₂₆abominatio Domini cogitationes malae

et purus sermo pulcherrimus

₂₇conturbat domum suam qui sectatur avaritiam

qui autem odit munera vivet

₂₈mens iusti meditatur oboedientiam

os impiorum redundat malis

₂₉longe est Dominus ab impiis et orationes iustorum exaudiet

₃₀lux oculorum laetificat animam fama bona inpinguat ossa

₃₁auris quae audit increpationes vitae

in medio sapientium commorabitur

₃₂qui abicit disciplinam despicit animam suam

qui adquiescit increpationibus possessor est cordis

₃₃timor Domini disciplina sapientiae

et gloriam praecedit humilitas