LIBER PROVERBIORUM 14

₁sapiens mulier aedificavit domum suam

insipiens instructam quoque destruet manibus

₂ambulans recto itinere et timens Deum

despicitur ab eo qui infami graditur via

₃in ore stulti virga superbiae

labia sapientium custodiunt eos

₄ubi non sunt boves praesepe vacuum est

ubi autem plurimae segetes ibi manifesta fortitudo bovis

₅testis fidelis non mentietur

profert mendacium testis dolosus

₆quaerit derisor sapientiam et non inveniet

doctrina prudentium facilis

₇vade contra virum stultum et nescito labia prudentiae

₈sapientia callidi est intellegere viam suam

et inprudentia stultorum errans

₉stultis inludet peccatum

inter iustos morabitur gratia

₁₀cor quod novit amaritudinem animae suae

in gaudio eius non miscebitur extraneus

₁₁domus impiorum delebitur

tabernacula iustorum germinabunt

₁₂est via quae videtur homini iusta

novissima autem eius deducunt ad mortem

₁₃risus dolore miscebitur et extrema gaudii luctus occupat

₁₄viis suis replebitur stultus et super eum erit vir bonus

₁₅innocens credit omni verbo astutus considerat gressus suos

₁₆sapiens timet et declinat malum

stultus transilit et confidit

₁₇inpatiens operabitur stultitiam et vir versutus odiosus est

₁₈possidebunt parvuli stultitiam

et astuti expectabunt scientiam

₁₉iacebunt mali ante bonos et impii ante portas iustorum

₂₀etiam proximo suo pauper odiosus erit amici vero divitum multi

₂₁qui despicit proximum suum peccat

qui autem miseretur pauperi beatus erit

₂₂errant qui operantur malum

misericordia et veritas praeparant bona

₂₃in omni opere erit abundantia

ubi autem verba sunt plurima frequenter egestas

₂₄corona sapientium divitiae eorum fatuitas stultorum inprudentia

₂₅liberat animas testis fidelis et profert mendacia versipellis

₂₆in timore Domini fiducia fortitudinis et filiis eius erit spes

₂₇timor Domini fons vitae ut declinet a ruina mortis

₂₈in multitudine populi dignitas regis

et in paucitate plebis ignominia principis

₂₉qui patiens est multa gubernatur prudentia

qui autem inpatiens exaltat stultitiam suam

₃₀vita carnium sanitas cordis putredo ossuum invidia

₃₁qui calumniatur egentem exprobrat factori eius

honorat autem eum qui miseretur pauperis

₃₂in malitia sua expelletur impius

sperat autem iustus in morte sua

₃₃in corde prudentis requiescit sapientia

et indoctos quoque erudiet

₃₄iustitia elevat gentem

miseros facit populos peccatum

₃₅acceptus est regi minister intellegens

iracundiam eius inutilis sustinebit