LIBER PROVERBIORUM 11

₁statera dolosa abominatio apud Dominum

et pondus aequum voluntas eius

₂ubi fuerit superbia ibi erit et contumelia

ubi autem humilitas ibi et sapientia

₃simplicitas iustorum diriget eos

et subplantatio perversorum vastabit illos

₄non proderunt divitiae in die ultionis

iustitia autem liberabit a morte

₅iustitia simplicis diriget viam eius

et in impietate sua corruet impius

₆iustitia rectorum liberabit eos

et in insidiis suis capientur iniqui

₇mortuo homine impio nulla erit ultra spes

et expectatio sollicitorum peribit

₈iustus de angustia liberatus est

et tradetur impius pro eo

₉simulator ore decipit amicum suum

iusti autem liberabuntur scientia

₁₀in bonis iustorum exultabit

civitas

et in perditione impiorum erit laudatio

₁₁benedictione iustorum exaltabitur civitas

et ore impiorum subvertetur

₁₂qui despicit amicum suum indigens corde est

vir autem prudens tacebit

₁₃qui ambulat fraudulenter revelat arcana

qui autem fidelis est animi celat

commissum

₁₄ubi non est gubernator populus corruet

salus autem ubi multa consilia

₁₅adfligetur malo qui fidem facit pro extraneo

qui autem cavet laqueos securus erit

₁₆mulier gratiosa inveniet gloriam et robusti habebunt divitias

₁₇benefacit animae suae vir misericors

qui autem crudelis est et propinquos abicit

₁₈impius facit opus instabile

seminanti autem iustitiam merces fidelis

₁₉clementia praeparat vitam et sectatio malorum mortem

₂₀abominabile Domino pravum cor

et voluntas eius in his qui simpliciter ambulant

₂₁manus in manu non erit innocens malus

semen autem iustorum salvabitur

₂₂circulus aureus in naribus suis mulier pulchra et fatua

₂₃desiderium iustorum omne bonum est praestolatio impiorum furor

₂₄alii dividunt propria et ditiores fiunt

alii rapiunt non sua et semper in egestate sunt

₂₅anima quae benedicit inpinguabitur

et qui inebriat ipse quoque inebriabitur

₂₆qui abscondit frumenta maledicetur in populis

benedictio autem super caput vendentium

₂₇bene consurgit diluculo qui quaerit bona

qui autem investigator malorum est opprimetur ab eis

₂₈qui confidet in divitiis suis corruet

iusti autem quasi virens folium germinabunt

₂₉qui conturbat domum suam possidebit ventos

et qui stultus est serviet sapienti

₃₀fructus iusti lignum vitae et qui suscipit animas sapiens est

₃₁si iustus in terra recipit quanto magis impius et peccator