LIBER PROVERBIORUM 10

₁parabolae salomonis

Filius sapiens laetificat patrem

filius vero stultus maestitia est matris suae

₂non proderunt thesauri impietatis

iustitia vero liberabit a morte

₃non adfliget Dominus fame animam iusti

et insidias impiorum subvertet

₄egestatem operata est manus remissa

manus autem fortium divitias parat

₅qui congregat in messe filius sapiens est

qui autem stertit aestate filius confusionis

₆benedictio super caput iusti

os autem impiorum operit iniquitatem

₇memoria iusti cum laudibus et nomen impiorum putrescet

₈sapiens corde praecepta suscipiet

stultus caeditur labiis

₉qui ambulat simpliciter ambulat confidenter

qui autem depravat vias suas manifestus erit

₁₀qui annuit oculo dabit dolorem stultus labiis verberabitur

₁₁vena vitae os iusti

et os impiorum operiet iniquitatem

₁₂odium suscitat rixas et universa delicta operit caritas

₁₃in labiis sapientis invenietur sapientia

et virga in dorso eius qui indiget corde

₁₄sapientes abscondunt scientiam

os autem stulti confusioni proximum est

₁₅substantia divitis urbs fortitudinis eius

pavor pauperum egestas eorum

₁₆opus iusti ad vitam fructus impii ad peccatum

₁₇via vitae custodienti disciplinam

qui autem increpationes relinquit errat

₁₈abscondunt odium labia mendacia

qui profert contumeliam insipiens est

₁₉in multiloquio peccatum non deerit

qui autem moderatur labia sua prudentissimus est

₂₀argentum electum lingua iusti

cor impiorum pro nihilo

₂₁labia iusti erudiunt plurimos

qui autem indocti sunt in cordis egestate morientur

₂₂benedictio Domini divites facit

nec sociabitur ei adflictio

₂₃quasi per risum stultus operatur scelus

sapientia autem est viro prudentia

₂₄quod timet impius veniet super eum desiderium suum iustis dabitur

₂₅quasi tempestas transiens non erit impius

iustus autem quasi fundamentum sempiternum

₂₆sicut acetum dentibus et fumus oculis

sic piger his qui miserunt eum

₂₇timor Domini adponet dies et anni impiorum breviabuntur

₂₈expectatio iustorum laetitia spes autem impiorum peribit

₂₉fortitudo simplicis via Domini et pavor his qui operantur malum

₃₀iustus in aeternum non commovebitur

impii autem non habitabunt in terram

₃₁os iusti parturiet sapientiam lingua pravorum peribit

₃₂labia iusti considerant placita et os impiorum perversa