ABDIAS PROPHETA 1

₁Visio Abdiae

haec dicit Dominus Deus ad Edom

auditum audivimus a Domino et legatum ad gentes misit

surgite et consurgamus adversum eum in proelium

₂ecce parvulum te dedi in gentibus contemptibilis tu es

valde

₃superbia cordis tui extulit te

habitantem in scissuris petrae

exaltantem solium suum

qui dicit in corde suo quis detrahet me in terram

₄si exaltatus fueris ut aquila

et si inter sidera posueris nidum tuum

inde detraham te dicit Dominus

₅si fures introissent ad te si latrones per noctem quomodo conticuisses

nonne furati essent sufficientia sibi

si vindemiatores introissent ad te

numquid saltim racemos reliquissent tibi

₆quomodo scrutati sunt Esau investigaverunt abscondita eius

₇usque ad terminum emiserunt te

omnes viri foederis tui inluserunt tibi

invaluerunt adversum te viri pacis tuae

qui comedunt tecum ponent insidias subter te

non est prudentia in eo

₈numquid non in die illa dicit Dominus

perdam sapientes de Idumea et prudentiam de monte Esau

₉et timebunt fortes tui a meridie

ut intereat vir de monte Esau

₁₀propter interfectionem et propter iniquitatem in fratrem tuum Iacob

operiet te confusio et peribis in aeternum

₁₁in die cum stares adversus

quando capiebant alieni exercitum eius

et extranei ingrediebantur portas eius

et super Hierusalem mittebant sortem

tu quoque eras quasi unus ex eis

₁₂et non despicies in die fratris tui in die peregrinationis eius

et non laetaberis super filios Iuda in die perditionis eorum

et non magnificabis os tuum in die angustiae

₁₃neque ingredieris portam populi mei in die ruinae eorum

neque despicies et tu in malis eius in die vastitatis illius

et non emitteris adversum exercitum eius in die vastitatis illius

₁₄neque stabis in exitibus ut interficias eos qui fugerint

et non concludes reliquos eius in die tribulationis

₁₅quoniam iuxta est dies Domini super omnes gentes

sicut fecisti fiet tibi retributionem tuam convertet in caput tuum

₁₆quomodo enim bibisti super montem sanctum meum

bibent omnes gentes iugiter

et bibent et absorbent et erunt quasi non sint

₁₇et in monte Sion erit salvatio et erit sanctus

et possidebit domus Iacob eos qui se possederant

₁₈et erit domus Iacob ignis et domus Ioseph flamma

et domus Esau stipula

et succendentur in eis et devorabunt eos

et non erunt reliquiae domus Esau quia Dominus locutus est

₁₉et hereditabunt hii qui ad austrum montem Esau

et qui in campestribus Philisthim

et possidebunt regionem Ephraim et regionem Samariae

et Beniamin possidebit Galaad

₂₀et transmigratio exercitus huius filiorum Israhel

omnia Chananeorum usque ad Saraptham

et transmigratio Hierusalem quae in Bosforo est

possidebit civitates austri

₂₁et ascendent salvatores in montem Sion iudicare montem Esau

et erit Domino regnum